Karin (1972) (Schweiz)

Öbis, dass dich as Lebe erinnered, a Friede, a sich glücklich zfühle: 

Bäum, d’Natur… Under em Chriesibaum z’Bäbike, mit dir spiele wo du no ganz chli gsi bisch. Ich bin im Gras glege und han dich so ufegrühert und han denkt das isch de glücklichscht Moment vo mim Lebe, das weiss ich no.

Was isch dini erscht Erinnerig als Chind?

Mir sind uf irgend eme Usflug gsi, und ich bin umgheit und han mir d’Chnü ufgschlage und es häd huere weh taa und blüetet. Bin ich wahrschinlich öbe drüü gsi. S’Mami und de Papi sind mit mir gsi.

Weli Bilder oder Gedanke chömed dir in Sinn, wenn ich folgendi Wörter säge?

Protest/protestiere: Streike, Plakat, viel Mensche i de Strass. Erschte Frauestrike. Döt bin ich nämlich debi gsi. Aso de erscht Frauestrike i de Schwiiz won ich 19ii gsi bin, da bin ich no im Gymi gsi… im 1991.

Wie isch das so det gsi?

Es isch meh es “Happening” gsi. Bin mitgange will all andere au gange sind. Ich wär au so gange. Das isch in Winterthur oder Züri gsi, weiss es ganz ehrlich nüme ganz. 

Macht: En Diktator oder en amerikanische Präsident. Macht häd für mich ehner öbis negativs. Ich selber bin nöd öbert wo wed Macht usüebe, scho gar nöd über anderi. Es häd für mich immer no öbis sehr maskulins, nüd feminins…

Wie gsehsch du dänn die Fraue wo momentant au Macht händ? (z.B Jacinda Ardern)

Die chund für mich jetzt nid eso übere, dass sie Macht ha wed. Sie macht eifach ihren Job und fertig. Sie häd zwar Macht, bis zumne gwüsse Grad, aber ich meine sie häd no es Parlament hinter sich i dere Rechtsform. Ich glaub nöd, das sie das usnützt. Ich glaube da händ Manne meh Tendenz dezue… oder dass sie das au bruched. Und ich glaub das änderet sich jetzt aber langsam. Es hed für mich ebe au öbis mit Glichstellig ztue, ich find das ganz wichtig und Macht für mich widerspricht das ebe. Wenn du Macht häsch, dänn bisch du nöd glichgstellt und es isch eigentlich völlig egal öbs Maa oder Frau isch, arm oder riich oder was au immer. Und es häd au irgenwie mit Autorität ztue…Und geg das han ich scho immer en… Abneigig gha.

Was macht dänn en guete Aführer?

Human sii und lose uf sini Lüüt. Lose, zuelose. Und nöd zu sim eigene Vorteil Sache mache, sondern als Gsamts guet vo de Gsellschaft denke.

 d’Gsellschaft: Mis Umfeld, wie mir i de Schwiiz zäme lebed. Wies ufgliedered isch… Was eusi Wert und Regle sind…fürs zämelebe. 

Wie gsehsch es du?

Im grössere Rahme und im chlinere… isch eifach wend mit Kollege zäme bisch… In gueter Gsellschaft bisch… Es häd für mich zwei Komponente: i de Gsellschaft sii und Gsellschaft z’ha.Wenn ich a “die Gesellschaft” denkt… für mich so im Kontext zu de Schwiiz… Gsellschaft… ja, Traditione, Kultur, Volksfescht… Abstimmige. In Asicht uf die ganz Welt…? Ich glaub als Mensche simer gsellig, grundsätzlich… aber mir tönd eus au sehr schwer demit…Und da chund mini…Regle: “Wenn alli die andere so behandle würdet, wies selber wend behandlet werde”,… dänn würs doch viel besser sii… E besseri Welt. Es bessers Zämesii, e besseri Gsellschaft.

Warum denksch du, dass Lüüt, das nid mache chönd, warum Lüüt s’Gfühl hend sie seged besser wie anderi?

Das han ich mir nie chöne erchläre. I mim ganze Lebe bis jetzt nöd. Für mich isch das völlig logisch, dass alli Lüüt glich sind.

Findsch du jetzt das eso, will du so erzoge worde bisch oder will du so bisch als Person?

Beides, wahrschinlich… Ich glaub Lüüt chömed irgenwie… klar häds demit ztue wie du ufgwachse bisch und was dini Vorbilder sind, aber ich glaub du häsch au irgendöbis i dir inne oder du häsch es nöd…

Wie gsehsch du d’Welt ii 50 Jahr? (realistisch gseh)

…Ich glaub es wird sehr viel Migratione gäh, wägem Klimawandel… Meh Chrieg, Luftverschmutzig… Ja ich denkt es wird schwierig für die kommende Generatione, will mir nid viel würklich mached und sich all die Weltregierige nöd zämerissed… 

Was bedütets menschlich sii?

Das gahd wieder echli i das ine. Ich mein eifach menschlich sii bedüted für mich anderi ahständig behandle, Mitgfühl zeige… ufenand luege.

Ah was glaubsch du?

…Ich glaube a mich und a die Lüüt won ich liebe… und eifach a die Grundwert won ich han. Und ich bin definitiv nöd religiös… Ich glaub au a kein Gott oder Götter. Ich glaub au nöd a irgendwelchi Macht oder suschtigi Macht det usse. Aso vo dem her bin ich en Atheist. Ich glaube a Lüüt und mini Wert und die versuech ich z’lebe. Das häd für mich nüd mit Religion z’tue, au wenn die irgenwie i de meischte Religione irgenwie vorchömed… aber sich dänn doch niemert dra haltet.

S’Grosi und de Grospapi sind ja eigentlich Christe, sie glaubed a die christliche Wert…Warum bisch du dänn spöter us de Chile ustrete?

Bi eus ischs so gsi, mir sind nie id Chile, aso mir händ nid bätet oder sind suscht in irgendere Form religiös gsi. Mir sind nur id Chile für e Hochziit oder e Beerdigung oder so… Und ich glaube au nöd, dass sie würklich, würklich a Gott glaubed, das händs au nie güsseret, aber es isch halt eifach so gsi. I de Gsellschaft Tradition…und bi mir isch das halt au so gsi… Aso ich bin dänn halt au in Konf-Unti will die andere au gange sind. Hüd isch das ganz andersch. Hüd bisch nüm komisch wend das nöd machsch oder nöd in Unti gahsch… Mer hed eifach wele debi sii… au is Lager und alles… und usserdem… wend 20 Mal Gange bisch, also in Unti, häsch en Büecher Guetschii becho, und ich han alles für Büecher Guetschii gmacht, da bin ich es paar Mal meh id d’Chile ghockt und das isch alles eifach a mir abperlt, es häd mich nid interessiert. Es hed mir nüd gseid. Für mich isch das dänn mit 18ii klar gsi und won ich dänn au hed müese Chilestüre zahle… Han ich gfunde chum nei, das isch nöd für mich. Andersiits wänn anderi en Glaube händ störts mich nöd… Ich gang nöd go missioniere. Was ich würklich nöd verträg sind Lüüt wo missioniered und andere ihren Glaube wend ufzwänge. Ich han dänn au keis Problem in e Chile z’gah… Was ich nöd mache isch, wenn e Beerdingung isch oder so…ich singe oder bete nöd, aber aber ich bin halt dete… s’glichlige inere Moschee oder i andere religiöse Ort.