Julie (1938) (Schweiz)

Öbis, dass dich as Lebe erinnered, a Friede, a sich glücklich zfühle:

A mini Chindheit, bi minere Tante won ich eigentlich ja ufgwachse bin. Bi mine viele Tier won ich gha han… Ja, also d’Jugendziit. Es isch, wie sölli säge? Es isch streng gsi, mir händ müese schaffe, aber mir händs schön gha. Wenn ich eifach mini Lüüt um mich han. Dänn gahds mir guet. Vor allem mini Familie… mini Familie, mini Nachbare au und…natürlich schnorr ich au gern. Ich mues mich chöne ustusche mit mine Lüüt, am Telefon oder suscht.

Was isch dini erscht Erinnerig als Chind?

… Das isch eifach de Alltag gsi bi eus… Morge ufstah, id Schuel gah, hei cho, zu de Tante, zu de Tier gah. Immer zersch zu de Geisse gah. Immer. Eini isch mir würklich blibe! Ganz e Frechi gsi. Do no händ Meidli müese Schosse aha…über de Rock ine… Das häd hine en Bändel gah, wie mers hüd i de Chuchi amigs a häd. Und jedes mal won ich verbiglofe bin, häd die mir d’Schossebändel ufzerrt. Id Schnorre gno und ufzerrt. Das isch glaubs ihren Tagesablauf gsi.

Weli Bilder oder Gedanke chömed dir in Sinn, wenn ich folgendi Wörter säge?

Protest/protestiere: Anderer Meinig sii, aso würd jetzt nie a sonen Protest…vo irgendöbisem gah, also uf d’Strass gah…

Warum? 

Es wär mir es bitzeli pinlich, warum das chan ich jetzt grad nöd sege… will mich dänn alli würdet gseh. Ich gib mini Meinig scho gern witer, ich würs au segemer imene Saal oder eso… das wär dänn wieder öbis anders. Protest chönd sehr eskaliere, das würd ich jetzt nid eso schätze. 

Häsch du jemals s’Gfühl gha, dass du für öbis häsch müese protestiere?

Es hett ja nüd gnützt…Nei, also es isch ja no viel frühener gsi. Es isch gange drum, dass d’Fraue, segemer viel weniger verdiened händ und da han ich mich au scho gwehrt gha. Sägemer bim Coop, eifach bimene Chef, gfröged, ja warum verdiene mir jetzt viel weniger als en Maa. Was häd er gseid, ja nüd! Leider isch dänn amels alles glich blibe, und dänn git mer ja no gern uf. Dänn denksch immer ich bin die won en dumme Latz häd. Und es bringts amels glich nöd. Du bisch dänn eifach immer die Bösi, praktisch, und das wotsch ja au nid sii. Das d’immer uffallsch, nur will d’immer negativ, also für die andere negativ, denksch. 

Hend sich vill Fraue do scho gwehrt?

Es häd sicher einigi gha, aber sehr wenigi. Will die sind abhängig gsi, die meischte. Da häd viellicht de Maa nöd gschaffed oder hed kei Arbeit gha. Die hend nid wele, dass mer ihne chünd. Da häds no schnell gheisse, wenns nid passt chasch ja gah. Dänn häd mers akzeptiert. Das isch dänn eigentlich ebe schad…, aber begrifflich, will es sind viel zviel Fraue wo ebe abhängig gsi sind vom Schaffe wo händ müese schaffe. Das isch bi mir nid so gsi, drum han ich dänn immer echli… gschupft, oder. Aber ebe ohni…, nur eimal häds öbis gnützt… Won ich mit em Oberchef Krach gha han, will de eus immer so umekommandiert häd und das isch nid recht und dieses isch nid guet… weiss nid was! Und dänn vor allne, vor de Chundschaft… Ja, er luegt uf eus abe, das isch sowieso so chli en Frauehasser gsi. Dänn han ich halt agfange, eso nöd. Dänn han ich müese is Büro, ich hed sölle zum Oberchef, aber ich han dänn eigentlich nie möse gha. Aber er isch dänn versetzt worde. Ganz es bitzeli häds öbis gnützt, es sind alli so froh gsi, dass de Mensch nüm ume gsi isch. Won ich ihn mal gseh han nachher, häd er mich es bitzeli bös aglueged und ich bin sehr nett gsi und han ihn sehr nett grüesst, das freud mich hüd no.

Macht: Macht usüebe, das häd es paar so obergschidi Lüüt, wo über eus alli wend Macht usüebe. Eus wend sege, eso isch es richtig, und das isch natürlich au e gfährlichi Sach, oder. Will ich lah mir da… Ich han viellicht au nid immer die richtig Meinig, das isch natürlich au no so, aber… ich würd mich au belehre lah. Oder, ich würd jetzt nid eifach säge, mini Meinig isch richtig fertig Schluss. Öb ichs dänn würd akzeptiere… uf all Fäll würd ich mich belehre lah und zuelose. Die momentane Aführer lönd sich eifach nid belehre, das isch s’Schlimmscht a eusere Gsellschaft eigentlich. Dass sich die.. sind ja nid viel, aber dass die sich nid belehre lönd, überhaupt nöd.

d’Gesellschaft: Uf all Fäll, nid besser wies früehner gsi isch. Will mer ja immer seid, früehner isch alles besser gsi… und das isch eifach i de hüdige Gsellschaft nid eso. Das häd sehr viel Negativs wies viellicht au Positivs häd, wos i jedere Ziit, i jedere Spanne vo de Gsellschaft… gueti Sache drin, aber au sehr viel Negativs drin. Und… ebe ich finde, dass mir leider i de hüdige Gsellschaft nöd sehr viel Positivs us allem nehmed. Wo mer chönt drusnäh.. oder. Sägemer ebe, so in Rassediskriminierig…Da han ich geschter..das chan ich viellicht schnell säge. En Seelsorger isch zu mir cho in Spital, das isch sehr en Nette gsi, und da simer au uf das cho…Ich bin uf das iigange und han gseid, dass bi mir alli glich segid öbs jetzt, ich weiss nöd… au vo de Farbe her, öbs jetzt schwarz, gääl, wiss oder grüen, das ich jede Mensch so nähmi wie er segi… Mer söd eifach Lüüt so behandle wie mer selber behandlet wed werde! Das han ich ihm au gseid. Religione ischs gliche… Und dänn uf eimal seid er: ”Händ Sie dänn no Enkel?” Ja, und dänn ebe ich heg eini und die säg mir dänn wänn ich echli, wahrschinlich uf die falsch Linie chäm wos duregahd. Da seid er: ”Ja, wie alt sind Sie?”, wenn er fröge dörf. Dänn han ich gseid. Jaaaa, ich segi 60ii gsi. Neiii neii, ich seg scho über 80ii gsi. Da seid er, dass chöng er jetzt nid begriffe, dass ich ebe i mim Alter sonen Istellig hegi, will leider hegid viel i dem Alter no völlig en anderi Istellig, oder. Wenn so öbert mit dere Istellig zu mir cho würd.. Das gits bi mir eifach nöd! Da würd ich afange diskutiere! Die Istellig isch gfährlich… sehr gfährlich. Vor allem, das jungi Lüüt de rechti Weg irgenwie nid findet, die findet en nöd! Will sie sind zfescht vo ihrene Eltere prägt uf e Siite wo d’Schwiizer meined, sie segid… ja nur mir seged öbert und alli andere sind eifach weniger. Und das isch, aber gfährlich. Will es sind nöd nur alti Lüüt wo eso denket…sonder au relativ viel Jungi…   

Wie gsehsch du d’Welt ii 50 Jahr? (realistisch gseh)

Also ich hoffe natürlich, dass es für eu Junge… eigentlich…nei jetzt hämer grad echli es Puff. Das lömer jetzt echli us. Das… eso eigentlich witergahd. Natürlich gits immer wieder Fortschritt und…ihr müend dra schaffe. Das es eifach alles no echli besser wird. Vor allem i de Gsellschaft. Mit Rassismus und… Wänn ihr dra schaffed…dänn gsehd sie nöd bös us. Würklich dra schaffed! Ihr würded das schaffe. Da dörfsch au d’Hoffnig nie ufgäh. Öbs jetzt halt mal wieder Bach ab gahd mit irgendöbisem, aber du dörfsch nid…ihr müend witerkämpfe, vor allem das. Kämpfe, das isch s’Wichtigscht.  Mer muess nid bös sii und kämpfe. Mer chan nett sii und kämpfe. 

Was bedütets menschlich sii?

Aso das heisst für mich. Ich tuen die andere so behandle wien ich selber au behandlet wed werde. Ussert sie chömed mir ganz doof, dänn fang ich mich a wehre. Dänn bin ich nüme ganz eso nett. Ich lah mir nid alles gfalle. 

A was glaubsch du?

Ad Grechtigkeit, ad Grechtigkeit und vorallem…mer seid ja immer mer häd ja ufs Lebe eigentlich nid sehr en grosse Ifluss, es chund ja sowieso wies mues cho. Oder du chasch nöd… Es chund wies chund…Nei, s’Lebe isch eim vorbestimmt. Wenn du ufd Welt chunsch isch dir scho vorbestimmt wenn du stirbsch. Aso das isch jetzt echli… fascht scho brutal gseid, aber… Mer ghörts immer wieder, das mer das eso seid. Du chasch es nöd, jetzt bestimme ich wed jetzt… i zeh Jahr sterbe, dänn isch für mich gloffe, das glaub ich nöd. Uf all Fäll chan mer aber en Ifluss uf sis Lebe ha, das isch sehr wichtig was mer für en Istellig häd. Psychisch vor allem. Dass mer kämpft, vor allem kämpft. Au wänns für alli andere Mal ussichtslos isch, und au viellicht mal en Arzt seid… ja, es häd kei Sinn meh und das gits nöd, aso bi mir nöd. Es wird kämpft bis zum Letschte, chasch säge.